རྣམ་དཔྱོད་ལྡན་པའི་བོད་མིའི་འོས་བསྡུའི་ཚོགས་མི།

• དཔལ་མོ་སྦུ་རུན་ནར་ལགས་ནི་ཛུ་རིག་གཙུག་ལག་སློབ་ཆེན་ནང་ཆབ་སྲིད་ཚན་རིག་ཐོག་ཉེ་བའི་འབུམ་རམ་པའི་སློབ་མ་ཞིག་ཡིན་པ་དང་། ཁོང་མོའི་ཉམས་ཞིབ་དང་བསླབ་གཞི་ཁག་ནི་བཙན་བྱོལ་བོད་མིའི་ཆབ་སྲིད་དང་། སྤྱི་ཚོགས་ལས་འགུལ། ཆབ་སྲིད་ནང་ཆ་ཤས་བླངས་ཕྱོགས། མང་གཙོའི་སློབ་སྦྱོང་བཅས་ཡིན། དེ་ཙམ་མ་ཟད་ཁོ་མོས་ཉམས་ཞིབ་ལས་འཆར་མང་པོ་ཞིག་གི་ཐོག་ལས་ཀ་བྱེད་བཞིན་ཡོད། དེ་ཡང་མང་ཆེ་བ་མང་ཚོགས་ཀྱི་འཕྲོད་བསྟེན་དང་འབྲེལ་བའི་གནད་དོན་ཁག་ཡིན། ད་ལྟའི་ཆར་ཏོག་དབྱིབས་གཉན་རིམ་༡༩ པ་དང་མང་གཙོའི་ཐོག་ལ་ཉམས་ཞིབ་བྱེད་མུས་ཡིན།

• ཉིན་ཟླ་ཚང་ཡེ་ཤེས་དེའུ་སྶི་ལགས་ནི་ཛུ་རིག་གཙུག་ལག་སློབ་ཆེན་ནས་སྤྱི་ཚོགས་དང་ཚོང་ལས་ཐོག་བསམ་བློའི་ཚན་རིག་ཐོག་གཙུག་ལག་རབ་འབྱམས་སློབ་ཐོན་དང་། ཁོང་མོས་ཏར་འཕྲིན་སོགས་ཀྱི་འབྲེལ་ལམ་དང་དྲྭ་ཐོག་ཚོང་ལས་ (Telecom and eCommerce) ཀྱི་ནང་དུ་མིའི་ནུས་ཁུངས་ཀྱི་ཁྱད་ལས་པའི་ངོ་བོའི་ཐོག་ནས་ལས་ཀ་བྱས་མྱོང་ཡོད། ད་ཆ་སུད་སི་ནང་གི་སེན་ཊེ་གཱ་ལེན་གཙུག་ལག་སློབ་ཆེན་ནང་འཛིན་སྐྱོང་ཐོག་ཉེ་བའི་འབུམ་རམ་པའི་སློབ་གཉེར་བྱེད་མུས་དང་གཙུག་ལག་སློབ་གྲྭའི་ནང་ཚོགས་སྡེ་ནང་ཁུལ་ཡིད་ཆེས་མི་བྱེད་དོན་གྱི་རྒྱུ་རྐྱེན་ཇི་ཡིན་སོགས་ཀྱི་སྐོར་ལ་ཉམས་ཞིབ་བྱེད་བཞིན་ཡོད།

• བདེ་ཆེན་སྤེན་པ་ལགས་ནི་དབྱིན་ཡུལ་དུ་སྐྱེས་འཚར་བྱུང་བའི་བོད་པ་ཞིག་ཡིན། ཁོང་ནི་ལོན་ཌོན་གྱི་གཙུག་ལག་སློབ་གྲྭ་ནས་ཨིན་སྐད་དང་འཇར་མེན་སྐད་ཡིག་ཐོག་རྩོམ་བྲིས་རིག་པའི་ཐོག་སློབ་ཐོན་སོན་པ་དང་། ལོ་ཤས་རིང་སྦར་ལེན་དུ་བོད་དོན་ཐོག་ཞུ་གཏུགས་གཙོ་བཟུང་ལས་འགུལ་སྤེལ་རྒྱུའི་ལས་ཀ་བྱས་ཡོད། དེ་རྗེས་ཕྱི་ལོ་ ༢༠༠༦ ནས་ ༢༠༠༨ བར་ལོ་གཉིས་རིང་རྒྱ་ནག་གི་རྒྱལ་ས་པེ་ཅིང་དུ་ལོ་གཉིས་བསྡད་ཡོད། ལོན་ཌོན་ནང་ཡོད་ (School of Oriental and African Studies) ནས་རྒྱ་སྐད་ཐོག་རབ་འབྱམས་པའི་ལག་ཁྱེར་སློབ་ཐོན་བྱས་རྗེས་ལོན་ཌོན་དུ་བཅའ་སྡོད་ཀྱིས་རི་མཐོ་ས་གཙང་ཞེས་པའི་དྲྭ་རྒྱའི་ཐོག་ལས་ཀ་བྱས་ཡོད། དྲྭ་རྒྱ་དེས་བོད་དོན་དང་འབྲེལ་བའི་དྲྭ་གནས་ཁག་ཏུ་ཐོན་པའི་གནས་ཚུལ་སོགས་ཨིན་བསྒྱུར་བྱེད་ཀྱི་ཡོད། དེ་བཞིན་བདེ་ཆེན་སྤེན་པ་ལགས་ཀྱིས་བོད་དོན་དང་འབྲེལ་བའི་གནད་དོན་ཐོག་ཉམས་ཞིབ་པ་དང་སློབ་སྟོན་པ་ཡང་བྱེད་བཞིན་ཡོད།

• གནམ་མཚོ་རེ་ཨིག་ལིན་ལགས་ནི་སུད་སིའི་ནང་ཡོད་གློག་པར་ལམ་ནས་ནད་གཞི་བརྟག་དཔྱད་པ་ཞིག་ཡིན་པ་དང་། སུད་སི་ནང་སྐྱེས་འཚར་བྱུང་ཡོད་ནའང་དུས་དང་རྣམ་པ་ཀུན་ཏུ་རང་ཉིད་བོད་པ་ཞིག་ཡིན་པའི་འདུ་ཟབ་པོ་ཡོད་པར་བརྟེན་སོ་སོའི་མི་རིགས་ཀྱི་སྐོར་ལ་ཤེས་རྒྱུའི་འདུན་པ་ཆེན་པོ་ཡོད་མཁན་ཞིག་ཀྱང་ཡིན། སུད་སི་ནང་གི་ཡོ་རོབ་བོད་རིགས་ན་གཞོན་མཐུན་ཚོགས་ཀྱི་རྒྱུན་ལས་ཀྱི་ལས་འཁུར་ཞུས་པའི་ཐོག་ནས་རང་ཉིད་ཀྱི་འཛིན་སྐྱོང་ཆེད་ལས་ལག་བསྟར་ཞུས་ཡོད། ཁོ་མོས་བོད་རིགས་སློབ་མའི་འདུ་འཛོམས་ཁ་ཤས་གོ་སྒྲིག་བྱས་པ་དང་། དེ་བཞིན་རྒྱལ་སྤྱིའི་རྩེད་འགྲན་ཆེན་མོ་ (Olympic) དང་བོད་དོན་ཐོག་ལས་འགུལ་མི་ཉུང་བ་ཞིག་ནང་མཉམ་ཞུགས་བྱེད་རྒྱུའི་གོ་སྐབས་བྱུང་བར་དགའ་སྤོབས་བྱེད་བཞིན་ཡོད།

• སེའུ་བསྟན་འཛིན་དམ་ཆོས་ལགས་ནི་ཆབ་སྲིད་ཚན་རིག་པ་ཞིག་ཡིན། ཁོང་གི་༧གོང་ས་མཆོག་གི་ཡོ་རོབ་དམིགས་བསལ་སྐུ་ཚབ་ཀྱི་དམིགས་བསལ་ཕྱག་རོགས་ཀྱི་ལས་འཁུར་ཞུས་མྱོང་ཡོད། ཁོང་ད་ལྟའི་ཆར་སུད་སི་ནང་དུ་ཡོད་པའི་དགའ་ལྡན་ཕོ་བྲང་ཐེབས་རྩའི་དྲུང་ཆེའི་ལས་འགན་ཞུ་བཞིན་ཡོད།

• ཤེལ་དཀར་དོན་གྲུབ་ལགས་ནི་ཛུ་རིཀ་ནང་སྒྱུ་རྩལ་གཙུག་ལག་སློབ་ཆེན་ (the University of the Arts) ནས་འབྲེལ་མཐུད་བཟོ་བཀོད་ (Interaction Design) ཐོག་སློབ་སྦྱོང་གནང་ཡོད། ཁོང་ནི་བཟོ་བཀོད་ཚོང་ལས་སྡེ་ཚན་ཞིག་གི་གསར་འཛུགས་བྱེད་མཁན་ཁོངས་ནས་གཅིག་ཡིན་པ་དང་ད་ལྟའི་ཆར་ Protonmail ཞེས་པའི་ནང་བཟོ་བཀོད་པ་གཙོ་བོ་དེ་ཡིན།

• བཀྲས་མཐོང་དབང་པོ་ལགས་ནི་ལོ་རྒྱུས་བྱུང་རབས་ཐོག་གི་སློབ་སྦྱོང་གི་རྒྱབ་ལྗོངས་ཡོད་པ་ཞིག་ཡིན་པ་དང་། ཁོང་ནི་་འབྲེལ་མཐུད་ཆེད་ལས་པའི་ངོ་བོའི་ཐོག་ནས་གཞུང་འབྲེལ་མ་ཡིན་པའི་ཚོགས་སྡེ་འདྲ་མིན་མང་པོ་ཞིག་གི་ལ་སློབ་སྟོན་པ་གནང་གི་ཡོད། ཁོང་ནི་བོད་མི་མང་སྤྱི་འཐུས་ལས་ཐོག་པ་ཞིག་ཡིན། ཡིན་ནའང་སྤྱི་འཐུས་ལ་སླར་ཡང་བཞེངས་རྒྱུ་མིན་པ་ཡོངས་གྲགས་གསལ་བཟོ་གནང་ཡོད།

༼རྣམ་དཔྱོད་ལྡན་པའི་བོད་མིའི་འོས།༽ཀྱི་སློབ་སྟོན་པའི་མཚན་ག༷ཞུང་།

• ཆོས་ཉིད་འོད་ཟེར། བོད་ཀྱི་བང་ཆེན་གསར་ཁང་གི་རྩོམ་སྒྲིག་པ།

• བདེ་ཆེན་སྐལ་ལྡན། ཁལ་མུཀ་ནང་བོད་དོན་ལས་འགུལ་བ་དང་། ཁོང་ནི་སྤྱི་ཚོགས་འབྲེལ་མཐུད་ལས་འགུལ་དང་ལྷག་པར་སྤྱི་ཚོགས་ཡར་རྒྱས་དང་རོགས་དངུལ་ཐབས་འཚོལ་ཐོག་ཁྱད་ལས་པ་ཞིག་ཀྱང་ཡིན། དེ་བཞིན་ཁལ་མུག་ན་གཞོན་མཐུན་ཚོགས་ཀྱི་ཚོགས་སྐོང་འགན་འཛིན་ལས་རོགས་དང་། བོད་རིགས་མི་རིགས་འདྲེས་མ་རྣམས་ཀྱི་མཐུན་ཚོགས་འཛུགས་མཁན་རྐང་ཞིག་ཀྱང་ཡིན།

• དགེ་བཤེས་ལྷག་རྡོར། ད་ལྟའི་ཆར་རྡ་སར་རྟེན་གཞི་བྱས་པའི་བོད་ཀྱི་དཔེ་མཛོད་ཁང་གི་ངེས་སྟོན་པ་ཡིན། ཁོང་ནི་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཨིན་སྐད་གསུང་བསྒྱུར་ཞབས་ཞུ་བ་ཟུར་པ་དང་། དེ་བཞིན་༧གོང་ས་མཆོག་དང་ལྷན་དུ་ནང་ཆོས་ཀྱི་དཔེ་དེབ་འགའ་ཤས་རྩོམ་སྒྲིག་ཕྱག་རོགས་ཞུས་ཡོད།

• བསྟན་པ་ཚེ་རིང་། ད་ལྟའི་ཆར་དགའ་ལྡན་ཕོ་བྲང་ཡིག་ཚང་གི་ཤར་ཨེ་ཤི་ཡའི་འབྲེལ་མཐུད་འགན་འཛིན་ཡིན་པ་དང་། ཁོང་ནི་བོད་མིའི་སྒྲིག་འཛུགས་ཀྱི་བཀའ་བློན་ཟུར་པ་དང་ལྡི་ལི་སྐུ་ཚབ་དོན་གཅོད་ཟུར་པ་ཡང་ཡིན།

• བསྟན་ཆོས་རྒྱ་མཚོ། རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་མཐུད་འགན་འཛིན་དང་། དེ་བཞིན་བོད་མི་མང་གི་སྤྱི་འཐུས་ཟུར་པ་ཞིག་ཀྱང་ཡིན།

• དགའ་གདོང་བསྟན་འཛིན་དབང་གྲགས། ནོར་ཝེ་བོད་ཀྱི་རླུང་འཕྲིན་ཁང་གི་གསར་འགོད་པ།

• ཌོག་ཌོར་བསྟན་འཛིན་དབང་མོ། སུད་སི་ནང་ཡོད་སྦཱ་སེལ་གཙུག་ལག་སློབ་ཆེན་ནང་ནི་སྐྱེ་དངོས་གསོ་རིག་གི་ལེགས་ཉེས་དཔྱད་གཞི་ཁང་གི་ཉམས་ཞིབ་ལས་རོགས་ཡིན།

• ཌོག་ཌོར་སྡོམ་པ་ཚེ་རིང་དབང་མོ། ཨ་རིའི་ནང་ཡོད་ཝི་ལཱ་ནོ་བ་གཙུག་ལག་སློབ་ཆེན་གྱི་ཨིན་སྐད་སྡེ་ཚན་གྱི་སློབ་དཔོན་གྱི་ལས་རོགས་ཡིན་པ་དང་། ཨིན་སྐད་ཐོག་སྙན་རྩོམ་གྱི་དཔེ་དེབ་པར་འགྲེམས་བྱེད་མཁན་བོད་པའི་བུད་མེད་ཐོག་མ་དེ་ཡང་ཡིན།